香港年金「計好晒先生 你問．我答信箱」：香港年金 vs 扣稅年金篇

吳太行超市買柑嘅時候醒起自己都想買年金，咁啱計好晒先生又揀緊榴蓮同柑，所以吳太就乘機捉住佢請教。

吳太：最近成日都見廣告賣扣稅年金，同你之前講嗰隻香港年金計劃有咩分別？

計好晒先生：坊間講嘅「扣稅年金」即係合資格延期年金保單 (Qualifying Deferred Annuity Policy，簡稱「QDAP」)¹。你知香港人愈嚟愈長壽，政府希望打工仔盡早規劃退休「自製長糧」，所以就為投保 QDAP 嘅納稅人提供稅務扣除優惠¹。QDAP 係需要投保人喺累積期分期交保費，然後到指定年齡先可以開始領取年金收入。QDAP 嘅有關保費可以申請稅務扣除，所以每逢稅季咪會成日見到「扣稅年金」嘅廣告囉。

至於我之前講嗰隻香港年金計劃係由政府推動成立嘅香港年金有限公司承保²，亦都係用嚟幫市民「自製長糧」。不過香港年金計劃係專為已退休或即將退休人士而設嘅即期年金，要60歲或以上嘅香港永久性居民先可以投保㗎。即期年金冇累積期，只要你畀咗保費，保單生效後最快下個月就可以開始領取年金收入。

其實 QDAP 同香港年金計劃嘅出發點都係幫市民「自製長糧」避免積蓄乾塘，不過產品設計上就有啲唔同，用嚟配合唔同年齡人士嘅需要。


吳太：原來係咁！我仲撈亂晒，咁即係香港年金計劃就唔可以申請稅務扣除？

計好晒先生：係啊。香港年金計劃嘅主要對象係已退休或即將退休人士吖嘛，況且退咗休基本上就冇做嘢，咁邊使交薪俸稅呢。


吳太：我退咗休幾年啦，稅就唔使再交，不過冇收入，就算有積蓄，用錢都會就住就住…有時買多個生果都會肉赤，因為有出冇入吖嘛…

計好晒先生：如果係咁，睇嚟「即買即享」嘅香港年金計劃可能會啱你，因爲交咗保費就可以成世有糧出，金額仲保證不變³。

你阿女啱啱出嚟做嘢，收入穩定，反而可以考慮用 QDAP 開始儲錢部署退休同申請稅務扣除，正所謂「never too early」嘛。阿女慳到稅，畀多啲家用你，咁就可以買多幾個日本柑、幾包士多啤梨。

計好晒先生提提你：喺安排退休計劃同選擇任何一種退休理財產品前，都要清楚了解自己嘅購買目的同實際需要，考慮財務狀況同風險承受能力。


吳太：如果阿女依家買咗 QDAP，佢老咗可唔可以都買香港年金計劃㗎？

計好晒先生：你咁叻嘅，梗係可以啦！ 如果有 QDAP，到60歲再買埋香港年金計劃，退休嘅時候就可以食兩份長糧㗎喇。


吳太：退咗休都分分鐘有二、三十年要過，如果錢唔夠「用過世」真係搞唔掂，話時話，香港年金係咪真係派終身㗎？

計好晒先生：係啊，香港年金計劃真係「長派長有，攞足一世」，你可以放心啦。

¹ 有關合資格延期年金保單詳情，請瀏覽保監局網站。
² 香港年金有限公司為香港特別行政區政府透過外匯基金全資擁有的香港按揭證券有限公司的全資附屬機構。
³ 保證每月年金金額會因應受保人投保時的年齡及性別而有所不同。如保單作部份退保或特別款項提取，其後的保證每月年金金額將會減少。

免責聲明：香港年金計劃乃人壽保險產品，受條款及細則約束，並涉及風險。以上資料僅供參考，及僅預期在香港使用，並不構成要約或銷售或在香港境外提供任何香港年金有限公司產品或任何保險產品。