香港年金「計好晒先生 你問．我答信箱」：避免老本受騙篇

計好晒先生啱啱收到香港年金計劃嘅每月年金收入¹，所以去星級酒樓飲茶嘆灌湯餃。

電視新聞咁啱報道最近經常有騙徒冒認銀行、保險公司、電訊公司、甚至網絡紅人等發佈虛假內容企圖詐騙，有人聽咗個電話或者㩒咗短訊嘅連結後就被人呃咗老本。

茶客兼街坊金生金太啱啱退休，擔心自己唔留神就會「中招」，佢哋知人如其名嘅計好晒先生做好晒防騙準備，喺騙徒面前「刀槍不入」，所以乘機請教幾招防騙“tips”。



金生：騙徒手法層出不窮，可唔可以過我兩招，等我哋冇咁易被人呃？

計好晒先生：知你哋好醒目，但係長氣都要多講幾次，一定要小心、小心、小心！

騙案頻生，你或者可以考慮將部分辛苦儲返嚟嘅老本轉為年金？香港年金計劃除咗可以幫你有序提取退休積蓄，唔會「洗凸」咗，仲可以將老本鎖定直至百年歸老，所以萬一唔好彩中招，起碼都可以保住年金份老本，減低損失。正所謂「有錢就呃到，無錢騙徒企喺度」。


金太：我驚萬一有騙徒聽到我對香港年金計劃有興趣，佢可能會冒認香港年金搵我喎，有咩“tips”可以避免中招？

計好晒先生：嗱，畀啲溫馨提示你啦：

• 香港年金計劃嘅銷售會面同投保過程只會喺香港年金公司位於銅鑼灣、觀塘或者荔枝角嘅客戶服務中心進行，並由有效牌照嘅香港年金公司銷售人員負責。如果有人約你去其他地方話幫你投保香港年金，咁你就明啦…
• 唔好向可疑人士，或經可疑訊息中嘅連結提供任何個人同財務資料。
• 香港年金公司唔會接受投保人以現金繳付保費，亦唔會要求投保人繳付保費畀非香港年金公司嘅第三方。
• 停一停，諗一諗，有懷疑就應該打 2512 5000 同香港年金公司核實，或者致電警方反詐騙協調中心「防騙易熱線 18222」尋求協助。
  

金生：有咩方法可以分辨假冒香港年金公司發出嘅可疑來電同短訊？

計好晒先生：如果接到報稱來自香港年金公司嘅可疑來電，你一定要核實該來電者身份，如果佢唔願意透露，就應即刻終止對話。如果有任何懷疑，千祈唔好向可疑來電者披露任何個人資料或答應任何要求，並且要喺結束通話後，即刻打 2512 5000 向香港年金公司核實。

另外，香港年金公司已參與通訊事務管理局辦公室推出嘅「短訊發送人登記制」。2024年6月3日起，所有由香港年金公司發送嘅短訊，都會使用以下其中一個已登記發送人名稱：

1. #HKMCA
2. #hkmca
3. #HKMCAcs
4. #HKMCAmkt
5. #HKMCAbiz
6. #HKMCAdm
7. #HKMCAinfo
   
   

收到發送人並非以「#」號開頭嘅短訊就要提高警覺，Link 咪亂撳！

¹ 保證每月年金金額會因應受保人投保時的年齡及性別而有所不同。如保單作部份退保或特別款項提取，其後的保證每月年金金額將會減少。

免責聲明：香港年金計劃乃人壽保險產品，受條款及細則約束，並涉及風險。以上資料僅供參考，及僅預期在香港使用，並不構成要約或銷售或在香港境外提供任何香港年金有限公司產品。