香港年金 「計好晒先生 你問．我答信箱」： 香港年金計劃 vs 銀色債券篇

計好晒先生最近收到好多朋友嘅訊息，問佢新一輪銀色債券（銀債）值唔值得認購，同埋揀香港年金計劃定銀債好。跑友王生跑得快，份人比較心急，所以一見到新聞就急不及待，要問計好晒先生拎意見。

王生：香港年金計劃同銀債都係為我哋老友記而設，不過兩樣其實有咩唔同？

計好晒先生：雖然香港年金計劃同銀債都係為60歲或以上嘅香港居民而設，但佢哋係兩種完全唔同嘅產品，功用都好唔同。

首先，香港年金計劃係保險產品，由香港年金有限公司（香港年金公司）承保，香港年金公司亦都獲保險業監管局監管。香港年金計劃可以將老友記嘅積蓄轉化成終身、不受市場波動影響嘅穩定每月年金收入¹，幫你應對「長壽風險」。你知啦，宜家香港人閒閒地有八、九十歲命²，如果冇一個「長糧」，積蓄真係隨時乾塘。另外，香港年金計劃係終身年金，顧名思義，佢係針對退休人士嘅長期需要， 所以年金收入會派發到百年歸老。

銀債係債券，所以你認購債券就係借錢畀發債機構，而銀債嘅發行機構就係香港政府。功用方面，銀債息率與本港通脹率掛鈎，利息每半年派發一次，主要用嚟應對「通脹風險」。但係留意返，銀債主要針對短期部署（年期一般為三年），仲有銀債係不定期發行，發行額都有上限，所以認購唔一定有求必應，申請幾多手未必會獲分配幾多手³。


李生：咁我應該揀香港年金計劃定銀債？

計好晒先生：啲後生仔有句潮語，「小朋友先選擇，大人全都要」，更何況我哋已經係老友記，點解要逼自己二揀一？

其實香港年金計劃同銀色債券都係政府幫市民做好退休理財嘅措施，而且各具特點，各有所長，兩者可以相輔相乘，所以你可以按自己嘅能力同需要，兩樣都要。

長氣講多次，退休理財組合嘅黃金定律係均衡，加上每種退休理財產品嘅功用都不同，各適其適，所以你可按需要喺理財組合入面配置不同退休產品，唔使 “all-in” 單一種。

¹ 保證每月年金金額會因應受保人投保時的年齡及性別而有所不同。如保單作部份退保或特別款項提取，其後的保證每月年金金額將會減少。
² 根據香港政府統計處網頁的資料，香港60歲男性平均預期壽命達86歲，而60歲女性平均預期壽命達90歲。香港政府統計處網頁：1971年至2021年的香港人口生命表（瀏覽日期：2024年7月）。
³ 有關銀色債券的詳情，請參閲政府債券網頁：https://www.hkgb.gov.hk/tc/retail/Silver_Key.html。

免責聲明：香港年金計劃乃人壽保險產品，受條款及細則約束，並涉及風險。以上資料僅供參考，及僅預期在香港使用，並不構成要約或銷售或在香港境外提供任何香港年金有限公司產品。